Home | Index of Poets Abdul Hameed Adam

maikadaa thaa chaa.Ndanii thii mai.n na thaa


maikadaa thaa chaa.Ndanii thii mai.n na thaa 
ik mujassam beKhudii thii mai.n na thaa 

ishq jab dam to.Dataa thaa tum na the 
maut jab sar dhun rahii thii mai.n na thaa 

tuur par chhe.Daa thaa jis ne aap ko 
vo merii diivaa.ngii thii mai.n na thaa 

maikade ke mo.D par rukatii hu_ii 
muddato.n kii tashnagii thii mai.n na thaa 

mai.n aur us Gunchaadahan kii aarazuu 
aarazuu kii sadagii thii mai.n na thaa 

gesuuo.n ke saaye me.n aaraam-kash 
sar-barahanaa zindagii thii mai.n na thaa 

dair-o-kaabaa me.n "Adam" hairat-farosh 
do jahaa.N kii bad_zanii thii mai.n na thaa 

Home | Index of Poets Abdul Hameed Adam
Maintained by Nita Awatramani
URL: http://www.urdupoetry.com
Last updated on: 24th March, 2001