Home | Index of Poets Akbar Allahabadi

saa.Ns lete huye bhii Darataa huu.N


saa.Ns lete huye bhii Darataa huu.N 
ye na samajhe.n ki aah karataa huu.N 

bahar-e-hastii me.n huu.N misaal-e-hubaab 
miT hii jaataa huu.N jab ubharataa huu.N 

[bahar-e-hastii = ocean of life]
[misaal-e-hubaab = like a bubble] 

itanii aazaadii bhii Ganimat hai 
saa.Ns letaa huu.N baat karataa huu.N 

sheKh saahab Khudaa se Darate ho 
mai.n to angrezo.n hii se Darataa huu.N 

aap kyaa puuchhate hai.n meraa mizaaj 
shukr allaah kaa hai marataa huu.N 

ye ba.Daa aib mujh me.n hai 'akbar' 
dil me.n jo aaye kah guzarataa huu.N 

Home | Index of Poets Akbar Allahabadi
Maintained by Nita Awatramani
URL: http://www.urdupoetry.com
Last updated on: 24th March, 2001