Home | Index of Poets Obaidullah Aleem

kuchh din to baso merii aa.Nkho.n me.n


kuchh din to baso merii aa.Nkho.n me.n 
phir Khvaab agar ho jaao to kyaa 

koii rang to do mere chehare ko 
phir zaKhm agar mahakaao to kyaa 

ik aaiinaa thaa so TuuT gayaa 
ab Khud se agar sharmaao to kyaa 

mai.n tanahaa thaa mai.n tanahaa huu.N 
tum aao to kyaa na aao to kyaa 

jab ham hii na mahake phir saahib 
tum baad-e-sabaa kahalaao to kyaa 

jab dekhane vaalaa koii nahii.n 
bujh jaao to kyaa jal jaao to kyaa 

Home | Index of Poets Obaidullah Aleem
Maintained by Nita Awatramani
URL: http://www.urdupoetry.com
Last updated on: 23rd July, 2001