Search This Site:


Powered by FreeFind

Home
Archive
List of Topics
FAQ
Contact Us

Related Websites
Urdu Poetry Archive
Ghazal Singers

Mailing Lists
Mehfil-e-Gazal
Lafz

Other Websites
Nita's Web
GEETanjali

Ashaar #009 - 'dost/dostii'

    
    Date: 18-Apr-2000
    Topic: 'dost/dostii'
    
    The topic for next week is 'Khaamoshii'. 
    Please send in your contributions by May 6th.
    
    
    Contributed by Ather Ali Shaikh:
    
    mujhe mere dosto.n se bachaa_iye "Rahi"
    dushmano.n se mai.n Khud nipaT luu.Ngaa
    [Saeed Rahi]
    
    
    Contributed by Deepak Purohit:
    
    
    dost Gam_Khvaarii me.n merii sa_ii farmaaye.nge kyaa
    zaKhm ke bharane talak naaKhuun na ba.Dh jaaye.nge kyaa
    [Mirza Ghalib]
    
    
    ai dost yuu.N to ham terii hasarat ko kyaa kahe.n
    lekin ye zi.ndagii bhii ko_ii zi.ndagii nahii.n
    [Firaq Gorakhpuri]
    
    
    jo munkir-e-vafaa ho fareb us pe kyaa chale
    kyo.n badagumaa.N huu.N dost se dushman ke baab me.n
    [Mirza Ghalib]
    
    
    nahii.n gar hamdardii aasaa.N na ho ye rashk kyaa kam hai
    na dii hotii Khudaayaa aarazuu-e-dost dushman ko
    [Mirza Ghalib]
    
    
    bhuul shayad bahut ba.Dii kar lii
    dil ne duniyaa se dostii kar lii
    [Bashir Badr]
    
    
    tum takalluf ko bhii iKhlaas samajhate ho "Faraz"
    dost hotaa nahii.n har haath milaane vaalaa
    [Ahmed Faraz]
    
    
    badagumaa.N ho ke mil aaii dost jo milanaa hai tujhe 
    ye jhijhakte hue milanaa koi milanaa bhii nahii.n 
    [Firaq Gorakhpuri]
    
    [badagumaa.N = without doubt/suspicion] 
    
    
    hame.n bhii dosto.n se kaam aa pa.Daa yaanii
    hamaare dosto.n ke bevafaa hone kaa vaqt aayaa
    [Hari Chand Akhtar]
    
    
    "Ghalib" nadiim-e-dost se aatii hai buu-e-dost
    mashaGuul-e-haq huu.N ba.ndagii-e-butaraab me.n
    [Mirza Ghalib]
    
    
    
    dosto.n se aaj mulaaqaat kii shaam hai
    ye sazaa kaaT ke phir apane ghar ko jaa_uu.Ngaa
    [Mazhar Imam]
    
    
    dushmano.n se pashemaa.N honaa pa.Daa 
    dosto.n kaa Khuluus aazamaane ke baad
    [Khumar Barabankvi]
    
    
    haTaaye the jo raah se dosto.n kii 
    vo patthar mere ghar me.n aane lage hai.n
    [Khumar Bbarabankvi]
    
    
    saaf kab imtihaan lete hai.n vo to dam deke jaan lete hai.n 
    zid har ek bat me.n nahii.n achchhii dost kii dost maan lete hai.n
    [Daag Dehlvi]
    
    
    giregii kahaa.N ye barq dosto
    meraa to kahii.n aashiyaa.N bhii nahii.n
    [Mumtaz Mirza]
    
    
    kyaa lutf-e-dostii ki nahii.n lutf-e-dushmanii
    dushman ko bhii jo dehiye puuraa kahaa.N hai ab
    [Daag Dehlvi]
    
    
    mai.n muddato.n jiyaa huu.N kisii dost ke baGair
    ab tum bhii saath chho.Dane ko kah rahe ho, Khair
    [Firaq Gorakhpuri]
    
    
    ham se puuchho na dostii kaa silaa
    dushmano.n kaa bhii dil hilaa degaa
    [Sudarshan Faakir]
    
    
    vo zamaanaa bhii tumhe.n yaad hai tum kahate the
    dost duniyaa me.n nahii.n "Daag" se bahatar apanaa
    [Daag Dehlvi]
    
    
    merii Khushii se mere dosto.n ko Gam hai "Shamim"
    mujhe bhii is kaa bahut Gam hai kyaa kiyaa jaaye
    [Shamim Jaipuri]
    
    
    Contributed by Pradipmaya:
    
    dostii jab kisii se kii jaaaye
    dushmano.n kii bhii raay lii jaaye
    [Raha Indori]
    
    [raay = opinion]
    
    
    Contributed by Nazneen Zaidi:
    
    ai dost tum se tark-e- ta'alluq ke baa-vajuud
    mahasuus kii hai terii zaruurat kabhii kabhii
    [Sahir Ludhianvi]
    
    
    Contributed by Sandeep Nain
    
    ye kahaa.N kii dostii hai ke bane hai.n dost naaseh
    ko_ii  chaarasaaz  hotaa ko_ii  Gam_gusaar  hotaa
    [Mirza Ghalib]
    
    
    ye fitnaa aadamii kii Khaanaaviraanii ko kyaa kam hai
    hue tum dost jis ke dushman us kaa aasamaa.N kyo.nho
    [Mirza Ghalib]
    
    
    
    Contributed by Syed Ayaz Quadri:
    
    laakh be-mehar sahii dost to rakhate ho "Faraz"
    inhe.n deKho ke jinhe.n ko_ii bhii sitamagar na milaa
    [Ahmed Faraz ]
    
    
    Some more couplets:
    
    yo.n lage dost teraa mujhase Khafaa ho jaanaa 
    jis tarah phuul se Khushbuu kaa judaa ho jaanaa 
    [Qateel Shifai]
    
    Dhuu.NDhane par bhii na milataa thaa mujhe apanaa vajuud 
    mai.n talaash-e-dost me.n yuu.N benishaa.N thaa dosto 
    [Jagannath Azad]
    
    
    dost ban ban ke mile mujhako miTaanevaale 
    mai.n ne dekhe hai.n kaii ra.ng badalanevaale 
    [Saeed Rahi]
    
    
    mere ham_nafas, mere ham_navaa, mujhe dost banake daGaa na de
    mai.n huu.N dard-e-ishq se jaa.N ba lab, mujhe zi.ndagii kii duaa na de
    [Shakeel Badayuni]
    
    [ba lab = at the brink of]
    
    
    ai dost miT gayaa huu.N fanaa ho gayaa huu.N mai.n 
    is daur-e-dostii kii davaa ho gayaa huu.N mai.n 
    [Hafeez Jullundhary]
    
    [daur = age/era]
    
    
    har taraf ziist kii raaho.n me.n ka.Dii dhuup hai dost 
    bas terii yaad ke saaye hai.n panaaho.n kii tarah 
    [Sudarshan Faakir]
    
    [ziist = life; ka.Dii = strong; panaah = shelter/protection]
    
    Khudaa jab dost hai ai "Daag" kyaa dushman se andeshaa 
    hamaaraa kuchh kisii kii dushmanii se ho nahii.n sakataa 
    [Daag Dehlvi]
    
    [andeshaa = apprehension/fear]
    
    apano.n ne nazar pherii to dil ne to diyaa saath
    duniyaa me.n ko_ii dost mere kaam to aayaa
    [Shakeel Badayuni]
    
    
    vo meraa dost hai saare jahaa.N ko hai maaluum 
    daGaa kare vo kisii se to sharm aaye mujhe 
    [Qateel Shifai]
    
    [daGaa = betrayal]
    
    
Maintained by Nita Awatramani
URL: http://www.ashaar.net
Last updated on: 19th October, 2000