mere qaabuu me.n na peharo.n dil-e-naashaad aayaa

mere qaabuu me.n na peharo.n dil-e-naashaad aayaa 
vo meraa bhuulane vaalaa jo mujhe yaad aayaa 

dil-e-viiraa.N se raqiibo.n ne muraade.n paa_ii.n
kaam kis kis ke meraa Khirman-e-barbaad aayaa

liijiye suniye ab afasaanaa-e-furqat mujh se 
aap ne yaad dilaayaa to mujhe yaad aayaa 

dii mu'azzin ne azaa.N vasl kii shab pichhale pahar
haaye kam_baKht ko kis vaqt Khudaa yaad aayaa 

bazm me.n un ke sabhii kuchh hai magar "Daag" nahii.n 
mujh ko vo Khaanaa-Kharaab aaj bahut yaad aayaa