ishq ne dil me.n jagaa kii to qazaa bhii aa_ii
Fani Badayuni

ishq ne dil me.n jagaa kii to qazaa bhii aa_ii
dard duniyaa me.n jab aayaa to davaa bhii aa_ii

dil kii hastii se kiyaa ishq ne aagaah mujhe
dil jab aayaa to dha.Dakane kii sadaa bhii aa_ii

sadqe utarae.nge, asiiraan-e-qafas chhuuTe hai.n
bijaliyaa.N leke nasheman pe ghaTaa bhii aa_ii

haa.N! na thaa baab-e-asr band, magar kyaa kahiye
aah pahu.Nchii thii ki dushman kii duaa bhii aa_ii

aap sochaa hii kiye, us se miluu.N yaa na miluu.N
maut mushtaaq ko miTTii me.n milaa bhii aa_ii

lo! masihaa ne bhii, allaah ne bhii yaad kiyaa
aaj biimaar ko hichakii bhii, qazaa bhii aa_ii

dekh ye jaadaa-e-hastii hai, sambhal kar "Fani"
piichhe piichhe vo dabe paao.N qazaa bhii aa_ii

Home | Index of Poets


Last updated on 21st May, 1998