ko_ii na_ii zamii.n ho nayaa aasamaa.N bhii ho

ko_ii na_ii zamii.n ho nayaa aasamaa.N bhii ho
ai dil ab us ke paas chale.n vo jahaa.N bhii ho

afsurdagii-e-ishq me.n soz-e-nihaa.N bhii ho
yaanii bujhe dilo.n se kuchh uThataa dhuaa.N bhii ho

[afsurdagii-e-ishq = disappointents in love]
[soz-e-nihaa.N = hidden sorrow]

is darjaa iKhtilaat aur itanii muGaayarat
tuu mere aur apane kabhii daramiyaa.N bhii ho

[darjaa = level/amount (of); iKhtilaat = closeness]
muGaayarat = aloofness; daramiyaa.N = in between]

ham apane Gam_gusaar-e-muhabbat na ho sake
tum to hamaare haal pe kuchh mehar_baa.N bhii ho

[Gam_gusaar = sympathizer]

bazm-e-tasavurrat me.n ai dost yaad aa
is mahafil-e-nishaat me.n Gam kaa samaa.N bhii ho

[bazm-e-tasavvuraat = gathering of thoughts/imagination]
[mahafil-e-nishaat = happy gathering]

mahabuub vo ki sar se qadam tak Khuluus ho
aashiq vahii ki husn se kuchh bad_gumaa.N bhii ho

[Khuluus = love/sweetness]