ghar jab banaa liyaa hai tere dar par kahe baGair
Mirza Ghalib

ghar jab banaa liyaa hai tere dar par kahe baGair
jaanegaa ab bhii tuu na meraa ghar kahe baGair

kahate hai.n, jab rahii na mujhe taaqat-e-suKhan
jaanuu.N kisii ke dil ki mai.n kyuu.Nkar kahe baGair

[taaqat-e-suKhan=strength to speak]

kaam us se aa pa.Daa hai ki jisakaa jahaan me.n
leve naa koii naam sitamagar kahe baGair

jii me.n hii kuchh nahii.n hai hamaare vagarnaa ham
sar jaaye yaa rahe na rahe.n par kahe baGair

chho.Duu.Ngaa mai.n na us but-e-kaafir kaa puujanaa
chho.De na Khalq go mujhe kaafir kahe baGair

[but=idol, Khalq=world ]

maqsad hai naaz-o-Gamzaa vale guftaguu me.n kaam
chalataa nahii.n hai, dashnaa-o-Kha.njar kahe baGair

[Gamzaa=amorous glance; dashnaa=dagger ]

har chand ho mushaahidaa-e-haq kii guftaguu
banatii nahii.n hai baadaa-o-saaGar kahe baGair

[mushaahid-e-haq=inspection of truth;]

baharaa huu.N mai.n to chaahiye duunaa ho iltafaat
sunataa nahii.n huu.N baat muqarrar kahe baGair

[iltafaat=mercy; muqarrar=again]

"Ghalib" na kar huzuur me.n tuu baar-baar arz
zaahir hai teraa haal sab un par kahe baGair

Home | Index of Poets


Last updated on 16th January, 1998