Home | Index of Poets Jigar Moradabadi

ko_ii ye kah de gulashan gulashan


ko_ii ye kah de gulashan gulashan 
laakh balaaye.N ek nasheman 

kaamil rah_bar qaatil rah_zan 
dil saa dost na dil saa dushman 

phuul khile hai.n gulashan gulashan 
lekin apanaa apanaa daaman 

umre.n biitii.n sadiyaa.N guzarii.n 
hai vahii ab tak aql kaa bachapan 

ishq hai pyaare khel nahii.n hai 
ishq hai kaar-e-shiishaa-o-aahan 

[kaar-e-shiishaa-o-aahan=(to) work with stone and glass] 

Khair mizaaj-e-husn kii yaa rab! 
tez bahut hai dil kii dha.Dakan 

aaj na jaane raaz ye kyaa hai 
hijr kii shab aur itanii raushan 

tuu ne sulajh kar gesuu-e-jaanaa.N 
aur ba.Daa dii dil kii ulajhan 

chalatii phiratii chhaao.n hai pyaare 
kis kaa saharaa kaisaa gulashan 

aa ki na jaane tujh bin kab se 
ruuh hai laashaa jism hai madafan 

kaam adhuuraa aur aazaadii 
naam ba.De aur tho.De darshan 

rahamat hogii Galib-e-isiyaa.N 
rashk karegii paakii-e-daaman 

kaa.NTo.n kaa bhii haq hai kuchh aaKhir
kaun chhu.Daaye apanaa daaman 

Home | Index of Poets Jigar Moradabadi
Maintained by Nita Awatramani
URL: http://www.urdupoetry.com
Last updated on: 25th February, 2003