ruKh me.n gard-e-malaal thii kyaa thii

ruKh me.n gard-e-malaal thii kyaa thii 
haasil-e-maah-o-saal thii kyaa thii 

[gard-e-malaal=dust of sorrow; haasil=result]
[maah-o-saal=months and years] 

ek suurat sii yaad hai ab bhii 
aap apanii misaal thii kyaa thii 

[misaal=example] 

mere jaanib uThii thii ko_ii nigaah 
ek mubaham savaal thii kyaa thii 

[jaanib=towards; mubaham=vague] 

us ko paakar bhii us ko paa na sakaa 
justajuu-e-jamaal thii kyaa thii 

[justajuu=search; jamaal=beauty] 

dil me.n thii par labo.n tak aa na sakii 
aarazuu-e-visaal thii kyaa thii 

[aarazuu=desire; visaal=union] 

umr bhar me.n bas ek baar aa_ii 
sa'at-e-laazavaal thii kyaa thii 

[sa'at=moment; laazavaal=imperishable] 

ko_ii Khvaahaa.N na thaa ki jins-e-hunar 
ek muflis kaa maal thii kyaa thii 

[Khvaahaa.N=desirous; jins-e-hunar=art things]
[muflis=poor]