Home | Index of Poets Majaz Lucknawi

barbaad tamannaa pe ataab aur zyaadaa


barbaad tamannaa pe ataab aur zyaadaa
haa.N merii mohabbat kaa javaab aur zyaadaa

roye na abhii ahal-e-nazar haal pe mere
honaa hai abhii mujh ko Kharaab aur zyaadaa

aavaaraa-va-majanuu.N hii pe maukuuf nahii.n kuchh
milane hai.n abhii mujh ko Khitaab aur zyaadaa

uThe.nge abhii aur bhii tuufaa.N mere dil se
dekhuu.Ngaa abhii ishq ke Khvaab aur zyaadaa

Tapakegaa lahuu aur mere diidaa-e-tar se
dha.Dakegaa dil-e-Khaanaa_Kharaab aur zyaadaa

ai mutrib-e-bebaak ko_ii aur bhii naGmaa
ai saaqii-e-fayyaaz sharaab aur zyaadaa

Home | Index of Poets Majaz Lucknawi
Maintained by Nita Awatramani
URL: http://www.urdupoetry.com
Last updated on: 1st January, 2003