Meer Taqi Meer


ashk aa.Nkho.n me.n kab nahii.n aataa
Meer Taqi Meer

ashk aa.Nkho.n me.n kab nahii.n aataa
lahuu aataa hai jab nahii.n aataa

hosh jaataa nahii.n rahaa lekin
jab vo aataa hai tab nahii.n aataa

dil se ruKhasat huii koii Khvaahish
giriyaa kuchh be-sabab nahii.n aata

ishq kaa hausalaa hai shart varnaa
baat kaa kis ko dhab nahii.n aataa

jii me.n kyaa-kyaa hai apane ae hamdam
har suKhan taa ba-lab nahii.n aataa

Home | Index of Poets


Last updated on 9th December, 1997