Home | February 2000 Index

Date: 21-Feb-2000
Poet: Daag Dehlvi

tumhaare Khat me.n nayaa ik salaam kis kaa thaa 
na thaa raqiib to aaKhir vo naam kis kaa thaa 

[raqiib = rival]

vo qatl kar ke har kisii se puuchhate hai.n 
ye kaam kis ne kiyaa hai ye kaam kis kaa thaa 

vafaa kare.nge nibhaaye.nge baat maane.nge 
tumhe.n bhii yaad hai kuchh ye kalaam kis kaa thaa 

rahaa na dil me.n vo be-dard aur dard rahaa 
muqiim kaun huaa hai maqaam kis kaa thaa 

[muqiim = resident/inhabitant; maqaam = position/stattion/place]

na puuchh-paachh thii kisii kii na aao-bhagat 
tumhaarii bazm me.n kal ehatamaam kis kaa thaa 

[aao-bhagat = hospitality; ehatamaam = arrangement/supervision]

hamaare Khat ke to purze kiye pa.Dhaa bhii nahii.n 
sun jo tum ne baa-dil vo payaam kis kaa thaa 

[purze = crumpled paper; baa-dil = with (your) heart]

i.nhii.n sifaat se hotaa hai aadamii mashahuur 
jo lutf aap hii karate to naam kis kaa thaa 

[sifaat = virtues; mashahuur = famous]

guzar gayaa vo zamaanaa kahe.n to kis se kahe.n 
Khayaal mere dil ko subah-o-shaam kis kaa thaa 

har ek se kahate hai.n kyaa "Daag" bevafaa nikalaa 
ye puuchhe in se ko_ii vo Gulaam kis kaa thaa 



-------------------------------------------------
Mehfil-e-Gazal Archive:
http://www.geocities.com/Paris/Rue/8764/

Nita's Urdu Poetry Archive:
http://www.urdupoetry.com

Please forward all your queries to moderator@urdupoetry.com
--------------------------------------------------