Meg Index | August 2000 Index

Date: 16-Aug-2000
Poet: Shehzad Ahmed


tay ho.nge kis tarah ye maraahil kahaa na jaa_e
is tiiragii me.n kyaa hai muqaabil kahaa na jaa_e

[maraahil = obstacles; tiiragii = darkness; muqaabil = in front]


Khud de diye hai.n mai.n ne use haath kaaT kar
vo likh diyaa hai jo sar-e-mahafil kahaa na jaa_e

[sar-e-mahafil = in a gathering]


patthar hue vo lafz ke the jiite jaagate 
is Khaamashii se kyaa huaa haasil kahaa na jaa_e

[Khaamashii = silence; haasil = gain]


ab tak to chal rahe.n hai.n tere saath saath ham
aaye.ngii kis jagah had-e-faasil kahaa na jaa_e

[had-e-faasil = boundary that separates]


nashaa hai yaa ke zahar fizaa me.n milaa huaa
kuchh hai har ek chiiz me.n shaamil kahaa na jaa_e

[fizaa = environment/air; shaamil = included]


aaKhir kahii.n to baiTh gaye paa.Nv to.D kar
phir kyaa kahe.nge agar ise manzil kahaa na jaa_e


ye aur baat kuchh bhii dikhaa_ii na de sake
aa.Nkhe.n khulii hu_ii ho.n to Gaafil kahaa na jaa_e

[Gaafil = unaware]


--------------------------------------------------
Mehfil-e-Gazal Archive:
http://www.geocities.com/urdu_poetry/meg/

Frequently Asked Questions:
http://www.geocities.com/urdu_poetry/faq.html

To unsubscribe, send a blank e-mail to 
urdu_poetry-unsubscribe@egroups.com

For all other queries, send an e-mail to 
moderator@urdupoetry.com
--------------------------------------------------