Meg Index | September 2000 Index

Date: 18-Sep-2000
Poet: Hafeez "Aatish"


tere baGair ye ab zindagii kahaa.N guzare
qadam qadam pe tere saath kaa gumaa.N guzare

[baGair = without; gumaa.N = suspicion/deception]


ye din jo dhiire se phisalaa to shaam ke manzar
tere baGair udaasii ke daramiyaa.N guzare

[phisalanaa = to slip; manzar = view; daramiyaa.N = (steeped)in]


vo ashk huu.N ki sar-e-raah gir gayaa thaa kabhii
uThaa sakaa na ko_ii kitane kaaravaa.N guzare

[sar-e-rah = on the road/by the roadside]


mai.n Khushk hoke bikharataa rahaa huu.N pairo.n me.n
bahut zamaanaa huaa mujh pe kashtiyaa.N guzare

[Khushk = dry; kashtii = boat]


tere badan kaa aalaa_o ho merii saa.Nso.n me.n
kabhii vo lamhaa bhii ik baar jaan-e-jaa.N guzare

[aalaa_o = storehouse of fire]


ye baat ab bhii nahii.n hai kisii se kahane kii 
tamaam sajde tere dar se raayagaa.N guzare

[tamaam = all; sajde = prayers/to bow; raayagaa.N = futile]




--------------------------------------------------
Mehfil-e-Gazal Archive:
http://www.geocities.com/urdu_poetry/meg/

Urdu Poetry Archive:
http://www.urdupoetry.com

To unsubscribe, send a blank e-mail to 
urdu_poetry-unsubscribe@egroups.com 

For all other queries, send an e-mail to 
moderator@urdupoetry.com
--------------------------------------------------