Home | Index of Poets Parveen Shakir

justajuu khoye huo.n kii umr bhar karate rahe


justajuu khoye huo.n kii umr bhar karate rahe 
chaa.Nd ke ham_raah ham har shab safar karate rahe 

raasto.n kaa ilm thaa ham ko na simto.n kii Khabar 
shahar-e-naamaaluum kii chaahat magar karate rahe 

ham ne Khud se bhii chhupaayaa aur saare shahar se 
tere jaane kii Khabar dar-o-divaar karate rahe 

vo na aayegaa hame.n maaluum thaa us shaam bhii 
intazaar us ka magar kuchh soch kar karate rahe 

aaj aayaa hai hame.n bhii un u.Daano.n kaa Khayaal 
jin ko tere zaum me.n be-baal-o-par karate rahe 

Home | Index of Poets Parveen Shakir
Maintained by Nita Awatramani
URL: http://www.urdupoetry.com
Last updated on: 25th May, 2001