Home | Index of Poets Parveen Shakir

kuchh to havaa bhii sard thii kuchh thaa teraa Khayaal bhii


kuchh to havaa bhii sard thii kuchh thaa teraa Khayaal bhii 
dil ko Khushii ke saath saath hotaa rahaa malaal bhii 

[sard=cold; malaal=sorrow] 

baat vo aadhii raat kii raat vo puure chaa.Nd kii 
chaa.Nd bhii ain chet kaa us pe teraa jamaal bhii 

[chet=name of a month; jamaal=beauty] 

sab se nazar bachaa ke vo mujh ko aise dekhate 
ek dafaa to ruk ga_ii gardish-e-maah-o-saal bhii 

dil to chamak sakegaa kyaa phir bhii taraash ke dekh lo 
shiishaagaraan-e-shahar ke haath kaa ye kamaal bhii 

[taraash=chisel/polish (stone); shiishaagar=glazier/one works with glass] 

us ko na paa sake the jab dil kaa ajiib haal thaa 
ab jo palaT ke dekhiye baat thii kuchh muhaal bhii 

[muhaal=difficult/impossible] 

merii talab thaa ek shaKhs vo jo nahii.n milaa to phir 
haath duaa se yuu.N giraa bhuul gayaa savaal bhii 

[talab=quest/want; shaKhs=person] 

shaam kii naasamajh havaa puuchh rahii hai ik pataa 
mauj-e-havaa-e-kuu-e-yaar kuchh to meraa Khayaal bhii 

[naasamajh=naive] 

us ke hii baazuuo.n me.n aur us ko hii sochate rahe 
jism kii Khvaahisho.n pe the ruuh ke aur jaal bhii 

Home | Index of Poets Parveen Shakir
Maintained by Nita Awatramani
URL: http://www.urdupoetry.com
Last updated on: 25th May, 2001