Home | Index of Poets Pirzada Qasim

Khuun se jab jalaa diyaa ek diyaa bujhaa huaa


Khuun se jab jalaa diyaa ek diyaa bujhaa huaa 
phir mujhe de diyaa gayaa ek diyaa bujhaa huaa 

ek hii daastaan-e-shab ek hii sil_silaa to hai 
ek diyaa jalaa huaa ek diyaa bujhaa huaa 

mahafil-e-rang-o-nuur kii phir mujhe yaad aa ga_ii 
phir mujhe yaad aa gayaa ek diyaa bujhaa huaa 

mujh ko nishaat se fuzuu.N rasm-e-vafaa aziiz hai 
meraa rafiiq-e-shab rahaa ek diyaa bujhaa huaa 

dard kii kaa_inaat me.n mujh se bhii raushanii rahii 
vaise merii bisaat kyaa ek diyaa bujhaa huaa 

sab merii raushanii-e-jaa.N harf-e-suKhan me.n Dhal ga_ii 
aur mai.n jaise rah gayaa ek diyaa bujhaa huaa 

Home | Index of Poets Pirzada Qasim
Maintained by Nita Awatramani
URL: http://www.urdupoetry.com
Last updated on: 4th July, 2001