na ho gar aashanaa nahii.n hotaa
Seemab Akbarabadi

na ho gar aashanaa nahii.n hotaa
but kisii kaa Khudaa nahii.n hotaa

tum bhii us vaqt yaad aate ho
jab ko_ii aasaraa nahii.n hotaa

dil me.n kitanaa sukuun hotaa hai
jab ko_ii muddavaa nahii.n hotaa

ho na jab tak shikaar-e-naakaamii
aadamii kaam kaa nahii.n hotaa

zindagii thii shabaab tak "Seemab"
ab ko_ii saanehaa nahii.n hotaa

Home | Index of Poets


Last updated on 15th October, 1999