jal bhii chuke paravaane ho bhii chukii rusvaa_ii
Shehzad Ahmed

jal bhii chuke paravaane ho bhii chukii rusvaa_ii
ab Khaak u.Daane ko baiThe hai.n tamaashaa_ii

taaro.n kii ziyaa dil me.n ik aag lagaatii hai
aaraam se raato.n ko sote nahii.n saudaa_ii

[ziyaa=light/brilliance]

raato.n kii udaasii me.n Khaamosh hai dil meraa
behis hai.n tamannaaye.n nii.nd aa_ii ki maut aa_ii

[behis=in a stupor]

ab dil ko kisii karavaT aaraam nahii.n milataa
ik umr kaa ronaa hai do din kii shanaasaa_ii

ik shaam vo aaye the ik raat farozaa.N thii
vo shaam nahii.n lauTii vo raat nahii.n aa_ii

[farozaa.N=lit-up]

Home | Index of Poets


Last updated on 28th June, 1999