un kii beruKhii me.n bhii iltefaat shaamil hai
Ameer Kazalbash

un kii beruKhii me.n bhii iltefaat shaamil hai
aaj kal merii haalat dekhane ke qaabil hai

[iltefaat = kindness]

qatl ho to meraa saa maut ho to merii sii
mere sogavaaro.n me.n aaj meraa qaatil hai

[sogavaaro.n = mourners]

muztarib hai.n mauje.n kyuu.N uTh rahe hai.n tuufaa.n kyuu.N 
kyaa kisii safiine ko aarazuu-e-saahil hai 

[muztarib = agitated; safiinaa = boat] 

sirf rahazan hii se kyuu.N 'Ameer' shikvaa ho 
manzilo.n kii raaho.n me.n rahabar bhii shaamil hai!

[rahazan = robber; rahabar = guide]