suu-e-maikadaa na jaate to kuchh aur baat hotii
Aga Hashr

suu-e-maikadaa na jaate to kuchh aur baat hotii
vo nigaah se pilaate to kuchh aur baat hotii 

[suu-e-maikadaa = towards the bar/place for drinking] 

go havaa-e-gulsitaa.N ne mere dil kii laaj rakh lii 
vo naqaab Khud uThaate to kuchh aur baat hotii 

ye bajaa kalii ne khil kar kiyaa gulsitaa.N muattar 
magar aap muskuraate to kuchh aur baat hotii 

[muattar = full of itr(perfume)] 

ye khule khule se gesuu inhe.n laakh tuu sa.Nvaare 
mere haath se sa.Nvarate to kuchh aur baat hotii 

go haram ke raaste se vo pahu.Nch gaye Khudaa tak 
terii raahaguzar se jaate to kuchh aur baat hotii