tum aur fareb khaao bayaan-e-raqiib se
Aga Hashr

tum aur fareb khaao bayaan-e-raqiib se 
tum se to kam gilaa hai ziyaadaa nasiib se 

[fareb khaanaa = to be deceived/tricked]
[bayaan-e-raqiib = rival's statement/declaration]
[gilaa = complaint; ziyaadaa = more]

goyaa tumhaarii yaad hii meraa ilaaj hai 
hotaa hai paharo.n zikr tumhaaraa tabiib se 

[goyaa = as if; ilaaj = cure; zikr = mention; tabiib = physician]

barbaad-e-dil kaa aaKhirii saramaayaa thii ummiid 
vo bhii to tum ne chhiin liyaa mujh Gariib se 

[saramaayaa = wealth; ummiid = hope]

dhundhalaa chalii nigaah, dam-e-vaapasii hai ab 
aa paas aa ke dekh luu.N tujh ko qariib se 

[dhundhalaa = misted; dam-e-vaapasii = time of death/close to death]