hai iKhtiyaar me.n tere to mojazaa kar de
Rana Sahri

hai iKhtiyaar me.n tere to mojazaa kar de
vo shaKhs meraa nahii.n hai use meraa kar de

ye ret_zaar kahii.n Khatm hii nahii.n hotaa
zaraa sii duur to rastaa haraa bharaa kar de

mai.n usake jor ko dekhuu.N vo meraa sabr-o-sukuu.N
mujhe charaaG banaa de use havaa kar de

akelii shaam bahut jii udaas karatii hai
kisii ko bhej koii meraa ham-navaa kar de