koii din gar zi.ndaganii aur hai
Mirza Ghalib

koii din gar zi.ndaganii aur hai
apane jii me.n hamane Thaanii aur hai

baarahaa dekhii.n hai.n unakii ra.njishe.n
par kuchh ab ke sar_giraanii aur hai

[sar_giraanii=pride]

deke Khat muu.Nh dekhataa hai naamaabar
kuchh to paiGaam-e-zabaanii aur hai

[naamaabar=messenger]

ho chukii.n "Ghalib" balaaye.n sab tamaam
ek marg-e-naagahaanii aur hai

[balaaye.n=calamity; marg=death; naagahaanii=sudden/accidental]