na shivaale, na qalisaa na haram jhuuThe hai.n
Ayaz Jhanswi

na shivaale, na qalisaa na haram jhuuThe hai.n
bas yahii sach hai ke tum jhuuThe ho ham jhuuThe hai.n

hamane dekhaa hii nahii.n bolate un ko ab tak
kaun kahataa hai ke patthar ke sanam jhuuThe hai.n

un se miliye to Khushii hotii hai un se milakar
sheahr ke duusare logo.n se jo kam jhuuThe hai.n

kuchh to hai baat jo tehariiro.n me.n taasiir nahii.n
jhuuThe fanakaar nahii.n hai.n to qalaam jhuuThe hai.n