mujhe de rahe.n hai.n tasalliyaa.N, vo har ek taazaa payaam se
Jigar Moradabadi

mujhe de rahe.n hai.n tasalliyaa.N, vo har ek taazaa payaam se
kabhii aake ma.nzar-e-aam par, kabhii haT ke ma.nzar-e-aam se

na Garaz kisii se na vaastaa, mujhe kaam apane hii kaam se
tere zikr se, terii fikr se, terii yaad se, tere naam se

mere saaqiyaa, mere saaqiyaa, tujhe marahabaa, tujhe marahabaa
tuu pilaaye jaa, tuu pilaaye jaa, isii chashm-e-jaam ba jaam se

terii subh-o-aish hai kyaa balaa, tujhe ai falak jo ho hausalaa
kabhii karale aake muqaabilaa, Gam-e-hijr-e-yaar kii shaam se