ab to ghabaraa ke ye kahate hai.n ke mar jaaye.nge

ab to ghabaraa ke ye kahate hai.n ke mar jaaye.nge 
mar ke bhii chain na paayaa to kidhar jaaye.nge 

tum ne Thaharaa_ii agar Gair ke ghar jaane kii 
to iraade yahaa.N kuchh aur Thahar jaaye.nge 

ham nahii.n vo jo kare.n Khuun kaa daavaa tujh par 
balqi puuchhegaa Khudaa bhii to mukar jaaye.nge 

aag dozaKh kii bhii ho jaayegii paanii paanii 
jab ye aasii arq-e-sharm se tar jaaye.nge 

[dozakh=hell; aasii=sinner; arq=sweat] 

sholaa-e-aah ko bijalii kii tarah chamakaauu.N 
par mujhe Dar hai, ki vo dekh kar Dar jaaye.nge 

laaye jo mast hai.n turbat pe gulaabii aa.Nkhe.n 
aur agar kuchh nahii.n, do phuul to dhar jaaye.nge 

nahii.n paayegaa nishaa.N ko_ii hamaaraa hargiz 
ham jahaa.N se ravish-e-tiir-e-nazar jaaye.nge 

[ravish-e-tiir-e-nazar=like an arrow thrown from the eye=a fleeting glance] 

pahu.Nche.nge rahaguzar-e-yaar talak ham kyuu.N kar 
pahale jab tak na do aalam se guzar jaaye.nge 

'Zauq' jo madarase ke biga.De hue hai.n mullaah 
unako maiKhaane me.n le aao sa.Nvar jaaye.nge