Home | April '99 Index

Date: 28-Apr-99
Poet:Nazeer Akbarabadi

duur se aaye the saaqii sun ke maiKhaane ko ham
bas tarasate hii chale afasos paimaane ko ham

may bhii hai miinaa bhii hai saagar bhii hai saaqii nahii.n
dil me.n aataa hai lagaa de.n mayaKhaane ko ham

ham ko fasanaa thaa qafaz me.n kyaa gilaa sayyaad kaa
bas tarasate hii rahe hai.n aab aur daane ko ham

baaG me.n lagataa nahii.n sahraa me.n ghabarataa hai dil
ab kahaa.N le jaake baiThe.n aise diivaane ko ham

kyaa hu_ii taqasiir hamase tuu bataa de ai "Nazeer"
taaki shaadii marg samajhe.n aise mar jaane ko ham