Home | June '99 Index

Date: 18-Jun-99
Poet: Shehzad Ahmed

jal bhii chuke paravaane ho bhii chukii rusvaa_ii
ab Khaak u.Daane ko baiThe hai.n tamaashaa_ii

taaro.n kii ziyaa dil me.n ik aag lagaatii hai
aaraam se raato.n ko sote nahii.n saudaa_ii

[ziyaa = light/brilliance]

raato.n kii udaasii me.n Khaamosh hai dil meraa
behis hai.n tamannaaye.n nii.nd aa_ii ki maut aa_ii

[behis = in a stupor]

ab dil ko kisii karavaT aaraam nahii.n milataa
ik umr kaa ronaa hai do din kii shanaasaa_ii

ik shaam vo aaye the ik raat farozaa.N thii
vo shaam nahii.n lauTii vo raat nahii.n aa_ii

[farozaa.N = lit-up]