Home | August '99 Index

Date: 05-Aug-99
Poet: Qamar Jalalwi 

mariiz-e-muhabbat u.nhii.n kaa fasaanaa sunaataa rahaa dam nikalate nikalate
magar zikr-e-shaam-e-alam jab bhii aayaa chiraaG-e-sahar bujh gayaa jalate jalate

iraadaa thaa tark-e-muhabbat kaa lekin fareb-e-tabassum me.n phir aa gaye ham
abhii khaake Thokar sambhalane na paaye ki phir khaa_ii Thokar sambhalate sambhalate

u.nhe.n Khat me.n likhaa thaa dil muztarib hai javaab un kaa aayaa muhabbat na karate
tumhe.n dil lagaane ko kisane kahaa thaa bahal jaayegaa dil bahalate bahalate

vo mehamaa.N rahe bhii to kab tak hamaare hu_ii shammaa gul aur Duube sitaare
"Qamar" is qadar un ko jaldii thii ghar kii vo ghar chal diye chaa.Ndanii Dhalate Dhalate

-------------------------------------------------
NOTE: The poet of MeG #246 is Qamar Jalalwi and not Qamar Jalalabadi. 

Also, the first line of the second sher should read:

iraadaa thaa tark-e-muhabbat kaa lekin 
fareb-e-tabassum me.n phir aa gaye ham

and NOT "fareb-e-muhabbat".

The error is regretted.