Home | August '99 Index

Date: 25-Aug-99
Poet: Athar Nafees

sochate aur jaagate saa.Nso.n kaa ik dariyaa huu.N mai.n 
apane gumgashtaa kinaaro.n ke liye bahataa huu.N mai.n 

jal gayaa saaraa badan in mausamo.n kii aag me.n 
ek mausam ruuh kaa hai jis me.n ab zi.ndaa huu.N mai.n 

mere ho.nTho.n kaa tabassum de gayaa dhokhaa mujhe 
tuune mujhako baaG jaanaa dekh le seharaa huu.N mai.n 

[tabassum = smile]

dekhiye merii paziraa_ii ko ab aataa hai kaun 
lamhaa bhar ko vaqt kii dahaliiz par aayaa huu.N mai.n 

[paziraa_ii = to accept]