Home | October '99 Index

Date: 13-Oct-99
Poet: Sagar Siddiqui

hai duaa yaad magar harf-e-duaa yaad nahii.n
mere naGmaat ko a.ndaaz-e-navaa yaad nahii.n

[naGmaat = songs; navaa = voice]

mai.n ne palako.n se dar-e-yaar pe dastak dii hai
mai.n vo saa_il huu.N jise ko_ii sadaa yaad nahii.n

[dar-e-yaar = lover's door; dastak = knock; saa_il = beggar; sadaa = call]

mai.n ne jin ke liye raaho.n me.n bichhayaa thaa lahuu
ham se kahate hai.n vahii ahad-e-vafaa yaad nahii.n

[ahad = promise]

kaise bhar aa_ii.n sar-e-shaam kisii kii aa.Nkhe.n
kaise tharraa_e charaaGo.n kii ziyaa yaad nahii.n

[ziyaa = brilliance/light]

sirf dhu.ndhalaa_ii sitaaro.n kii chamak dekhii hai
kab huaa kaun huaa kis se Khafaa yaad nahii.n

zi.ndagii jabr-e-musalasal kii tarah kaTatii hai
jaane kis jurm kii paa_ii  hai sazaa yaad nahii.n

[jabr = oppression; musalasal = continuous]

aao ik sajdaa kare.n aalam-e-madhahosh me.n
log kahate hai.n ke "Sagar" ko Khudaa yaad nahii.n

[sajdaa = to prostrate oneself]