Home | October '99 Index

Date: 04-Nov-99
Poet: Nida Fazli

dil me.n na ho jurrat to muhabbat nahii.n milatii
Khairaat me.n itanii ba.Dii daulat nahii.n milatii

[jurrat = courage; Khairaat = charity]

kuchh log yuu.N hii shahar me.n ham se bhii Khafaa hai.n
har ek se apanii bhii tabiiyat nahii.n milatii

[Khafaa = annoyed/angry]

dekhaa thaa jise mai.n ne ko_ii aur thaa shaayad
vo kaun hai jis se terii suurat nahii.n milatii

ha.Nsate huye cheharo.n se hai baazaar kii ziinat
rone ko yahaa.N vaise bhii fursat nahii.n milatii

[ziinat = beauty/adornment; fursat = leisure time]