Home | October '99 Index

Date: 15-Nov-99
Poet: Majaz

husn ko be-hijaab honaa thaa 
shauq ko kaamayaab honaa thaa 

[be-hijaab = unveiled]

hijr me.n kaif-e-iztaraab na puuchh 
Khuun-e-dil bhii sharaab honaa thaa 

[hijr = separation; iztaraab = restlessness]

tere jalvo.n me.n ghir gayaa aaKhir 
zarre ko aafataab honaa thaa 

kuchh tumhaarii nigaah kaafir thii 
kuchh mujhe bhii Kharaab honaa thaa 

raat taaro.n kaa TuuTanaa bhii "Majaz" 
baa_is-e-iztaraab honaa thaa 

baa_is = reason; iztaraab = restlessness]