Home | January 2000 Index

Date: 14-Jan-2000
Poet: Anwar Mirzapuri

From the Ghulam Ali Golden Collection album:


mai.n nazar se pii rahaa huu.N ye samaa badal na jaae 
na jhukaao tum nigaahe.n kahii.n raat Dhal na jaae 

mere ashk bhii hai.n is me.n ye sharaab ubal na jaae 
meraa jaam chhuunevaale teraa haath jal na jaae 

abhii raat kuchh hai baaqii na uThaa naqaab saaqii 
teraa ri.nd girate girate kahii.n phir sambhal na jaae 

merii zi.ndagii ke maalik mere dil pe haath rakhanaa 
tere aane kii Khushii me.n meraa dam nikal na jaae 

mujhe phuu.Nkane se pahale meraa dil nikaal lenaa 
ye kisii kii hai amaanat kahii.n saath jal na jaae 


-------------------------------------------------
Mehfil-e-Gazal Archive:
http://www.geocities.com/Paris/Rue/8764/

Nita's Urdu Poetry Archive:
http://www.urdupoetry.com

Please forward all your queries to moderator@urdupoetry.com
--------------------------------------------------