Home | January 2000 Index

Date: 17-Jan-2000
Poet: Sudarshan Faakir


ishq me.n Gairat-e-jazbaat ne rone na diyaa
varna kyaa baat thii kis baat ne rone na diiyaa

[Gairat = honour/self-respect; jazbaat = emotion]

aap kahate the ke rone se na badale.nge nasiib
umr bhar aap kii is baat ne rone na diiyaa

ronevaalo.n se kah do un kaa bhii ronaa role.n
jin ko majabuuri-e-haalaat ne rone na diiyaa

tujh se milakar hame.n ronaa thaa bahot ronaa thaa
ta.ngii-e-vaqt-e-mulaaqaat ne rone na diiyaa

[ta.ngii-e-vaqt-e-mulaaqaat = shortness of the time of meeting]

ek do roz kaa sadamaa ho to ro le.n 'Faakir' 
ham ko har roz ke sadamaat ne rone na diiyaa


-------------------------------------------------
Mehfil-e-Gazal Archive:
http://www.geocities.com/Paris/Rue/8764/

Nita's Urdu Poetry Archive:
http://www.urdupoetry.com

Please forward all your queries to moderator@urdupoetry.com
--------------------------------------------------