Home | January 2000 Index

Date: 30-Jan-2000
Poet: Nida Fazli

jahaa.N na terii mahak ho udhar na jaa_uu.N mai.n 
merii sarisht safar hai guzar na jaa_uu.N mai.n 

[sarisht = nature] 

mere badan me.n khule ja.ngalo.n kii miTTii hai 
mujhe sambhaal ke rakhanaa bikhar na jaa_uu.N mai.n 

mere mizaaj me.n be-maanii ulajhane.n hai.n bahut 
mujhe udhar se bulaanaa jidhar na jaa_uu.N mai.n 

[be-maanii = meaningless] 

kahii.n pukaar na le gaharii vaadiyo.n kaa sabuut 
kisii maqaam pe aakar Thahar na jaa_uu.N mai.n 

[sabuut = silence] 

na jaane kaun se lamhe kii bad-duaa hai ye 
qariib ghar ke rahuu.N aur ghar na jaa_uu.N mai.n 

-------------------------------------------------
Mehfil-e-Gazal Archive:
http://www.geocities.com/Paris/Rue/8764/

Nita's Urdu Poetry Archive:
http://www.urdupoetry.com

Please forward all your queries to moderator@urdupoetry.com
--------------------------------------------------