Home | March 2000 Index

Date: 7-Mar-2000
Poet: Nazeer Baqri

4th ghazal from 'Saher':

yaad nahii.n kyaa kyaa dekhaa thaa saare manzar bhuul gaye 
us kii galiyo.n se jab lauTe apanaa bhii ghar bhuul gaye 

Khuub gaye pardes ki apane diivaar-o-dar bhuul gaye 
shiish-mahal ne aisaa gheraa miTTii ke ghar bhuul gaye 

tujh ko bhii jab apanii qasame.n apane vaade yaad nahii.n 
ham bhii apane Khvaab terii aa.Nkho.n me.n rakh kar bhuul gaye 

mujh ko ji.nho.ne qatl kiyaa hai ko_ii u.nhe.n batalaaye "Nazeer"
merii laash ke pahaluu me.n vo apanaa Khanjar bhuul gaye 


-------------------------------------------------
Mehfil-e-Gazal Archive:
http://www.geocities.com/Paris/Rue/8764/

Nita's Urdu Poetry Archive:
http://www.urdupoetry.com

Please forward all your queries to moderator@urdupoetry.com
--------------------------------------------------