Home | March 2000 Index

Date: 26-Mar-2000
Poet: Aga Hashr

One of my favourite ghazals, this has been sung 
by Farida Khanum. 

suu-e-maikadaa na jaate to kuchh aur baat hotii 
vo nigaah se pilaate to kuchh aur baat hotii 

[suu-e-maikadaa = towards the bar/place for drinking] 

go havaa-e-gulasitaa.N ne mere dil kii laaj rakh lii 
vo naqaab Khud uThaate to kuchh aur baat hotii 

[gulasitaa.N = garden]

ye bajaa kalii ne khil kar kiyaa gulasitaa.N muattar 
magar aap muskuraate to kuchh aur baat hotii 

[muattar = fragrant] 

ye khule khule se gesuu, i.nhe.n laakh tuu sa.Nvaare 
mere haath se sa.Nvarate, to kuchh aur baat hotii 

[gesuu = hair]

go haram ke raaste se vo pahu.Nch gaye Khudaa tak 
terii raahaguzar se jaate to kuchh aur baat hotii 

[haram = sacred territory of Mecca]

-------------------------------------------------
Mehfil-e-Gazal Archive:
http://www.geocities.com/Paris/Rue/8764/

Nita's Urdu Poetry Archive:
http://www.urdupoetry.com

Please forward all your queries to moderator@urdupoetry.com
--------------------------------------------------