Home | March 2000 Index

Date: 30-Mar-2000
Poet: Faiz Ahmed Faiz

kab yaad me.n teraa saath nahii.n kab haath me.n teraa haath nahii.n 
sad shukr ke apanii raato.n me.n ab hijr kii koii raat nahii.n 

[sad shukr = thousand thanks; hijr = separation]

mushkil hai.n agar haalaat vahaa.N dil bech aaye.N jaa.N de aaye.N 
dil vaalo kuuchaa-e-jaanaa.N me.n kyaa aise bhii haalaat nahii.n 

[kuuchaa = street; jaanaa.N = beloved]

jis dhaj se koii maqtal me.n gayaa vo shaan salaamat rahatii hai 
ye jaan to aanii jaanii hai is jaa.N kii to koii baat nahii.n 

[dhaj = pride; maqtal = place of sacrifice; salaamat = safe]

maidaan-e-vafaa darbaar nahii.n yaa.N naam-o-nasab kii puuchh kahaa.N 
aashiq to kisii kaa naam nahii.n kuchh ishq kisii kii zaat nahii.n 

[maidaan = field; darbaar = court; naam = name; nasab = lineage]
[zaat = caste/creed]

gar baazii ishq kii baazii hai jo chaaho lagaa do Dar kaisaa 
gar jiit gaye to kyaa kahanaa haare bhii to baazii maat nahii.n 

[baazii = gamble; Dar = fear; maat = defeat]

-------------------------------------------------
Mehfil-e-Gazal Archive:
http://www.geocities.com/Paris/Rue/8764/

Nita's Urdu Poetry Archive:
http://www.urdupoetry.com

Please forward all your queries to moderator@urdupoetry.com
--------------------------------------------------