Meg Index | June 2000 Index

Date: 12-Jun-2000
Poet: Bahadur Shah Zafar


A ghazal by Zafar by request from some of our subscribers. 
This ghazal has been sung by Bhupinder Singh.


yaa mujhe afsar-e-shaahaa na banaayaa hotaa 
yaa meraa taaj gadaayaa na banaayaa hotaa 

[afsar-e-shaahaa = royal officer; gadaayaa = like a beggar] 


Khaak_saarii ke liye garche banaayaa thaa mujhe 
kaash Khaak-e-dar-e-jaanaa.N na banaayaa hotaa 

[Khaak_saarii = humbleness; garche = if;  dar = door]


nashaa-e-ishq kaa gar zarf diyaa thaa mujhako 
umr kaa tang na paimaanaa banaayaa hotaa 

[zarf = capacity; tang = short] 


apanaa diivaanaa banaayaa mujhe hotaa tuune 
kyo.n Khirad_mand banaayaa, na banaayaa hotaa 

[Khirad_mand = intelligent/wise]


sholaa-e-husn chaman me.n na dikhaayaa usane 
varanaa bul-bul ko bhii paravaanaa banaayaa hotaa 

roz-e-mamuuraa-e-duniyaa me.n Kharaabii hai "Zafar"
aisii bastii se to viiraanaa banaayaa hotaa 


--------------------------------------------------
Mehfil-e-Gazal Archive:
http://www.geocities.com/urdu_poetry/meg/

Urdu Poetry Archive:
http://www.urdupoetry.com

E-mail your queries to moderator@urdupoetry.com
--------------------------------------------------