Meg Index | November 2000 Index

Date: 01-Nov-2000
Poet: Sagar Siddiqui


kaliyo.n kii mahak hotaa taaro.n kii ziyaa hotaa
mai.n bhii tere gulshan me.n phuulo.n kaa Khudaa hotaa

[mahak = fragrance; ziyaa = bright light; gulshan = garden]

har chiiz zamaane kii aa_iinaa-e-dil hotii
Khaamosh muhabbat kaa itanaa to silaa hotaa

tum haal-e-pareshaa.N kii pursish ke liye aate
saharaa-e-tamannaa me.n melaa saa lagaa hotaa

[pursish = to inquire (about someone's condition)]
[saharaa = desert]

har gaam pe kaam aaye zulfo.n ke terii saaye
ye qaafilaa-e-hastii be-rah-numaa na hotaa

[gaam = step; qaafilaa = caravan; hastii = life]
[be-rah-numaa = without a guide]

ehasaas kii Daalii par ik phuul mahakataa hai
zulfo.n ke liye tum ne ik roz chunaa hotaa