Meg Index | November 2000 Index

Date: 14-Nov-2000
Poet: Qateel Shifai


apane haatho.n kii lakiiro.n me.n basaale mujh ko 
mai.n huu.N teraa to nasiib apanaa banaa le mujh ko 

mujh se tuu puuchhane aayaa hai vafaa ke maanii 
ye terii sadaa-dilii maar na Daale mujh ko 

mai.n samandar bhii huu.N motii bhii huu.N Gotaazan bhii 
ko_ii bhii naam meraa leke bulaale mujh ko 

[Gotaazan = diver]

tuune dekhaa nahii.n aa_iine se aage kuchh bhii 
Khud-parastii me.n kahii.n tuu na ga.Nvaale mujh ko 

kal kii baat aur hai mai.n ab saa rahuu.N yaa na rahuu.N 
jitanaa jii chaahe teraa aaj sataale mujh ko 

Khud ko mai.n baa.NT na Daaluu.N kahii.n daaman-daaman 
kar diyaa tuune agar mere havaale mujh ko 

mai.n jo kaa.NTaa huu.N to chal mujh se bachaakar daaman 
mai.n huu.N gar phuul to juu.De me.n sajaale mujh ko 

mai.n khule dar ke kisii ghar kaa huu.N saamaa.N pyaare 
tuu dabe paa.Nv kabhii aake churaale mujh ko 

tark-e-ulfat kii qasam bhii ko_ii hotii hai qasam 
tuu kabhii yaad to kar bhuulane vaale mujh ko 

baadaa phir baadaa hai mai.n zahar bhii pii jaa_uu.N "Qateel" 
shart ye hai ko_ii baaho.n mei.n sambhale mujh ko