Meg Index | February 2001 Index

Date: 21-Feb-2001
Poet: Zauq


laa_ii hayaat aaye qazaa le chalii chale 
apanii Khushii na aaye na apanii Khushii chale 

[qazaa=death] 


behatar to hai yahii ki na duniyaa se dil lage 
par kyaa kare.n jo kaam na be-dillagii chale 


kam ho.nge is bisaat pe ham jaise bad_qimaar 
jo chaal ham chale so nihaayat burii chale 

[bisaat = game board; bad_qimaar = novice player]


ho umr-e-Khizr bhii to kahe.nge ba_vaqt-e-marg 
ham kyaa rahe yahaa.N abhii aaye abhii chale 

[ba_vaqt-e-marg=at the time of death] 


duniyaa ne kis kaa raah-e-fanaa me.n diyaa hai saath 
tum bhii chale chalo yuu.N hii jab tak chalii chale 

[fanaa = cessation of life, end] 


naazaa.N na ho Khirad pe jo honaa hai vo hii ho 
daanish terii na kuchh merii daanishvarii chale 

[naazaa.N hona=to be proud; Khirad=intellect; daanish=intellect] 


jaate havaa-e-shauq me.n hai.n is chaman se 'Zauq' 
apanii balaa se baad-e-sabaa ab kabhii chale 

[baad-e-sabaa = morning breeze]