Meg Index | June 2002 Index

Date: 12-Jul-2002
Poet: Amjad Islam Amjad

ham hii aaGaaz-e-mohabbat me.n the anjaan bahut
varnaa nikale the tere vasl ke unvaan bahut

[aaGaaz = start; unvaan = title/subject]

dil bhii kyaa chiiz ab paa ke use sochataa huu.N
kyaa isii vaaste chhaane the bayaabaan bahut

[bayaabaan = wilderness/jungle]

ai Gam-e-ishq merii aa.Nkh ko patthar kar de
hai.n mere sar pe tere aur bhii ehasaan bahut

faasale raah-e-ta'alluq ke miTe.nge kyuu.N kar
husn paaband-e-anaa ishq tan aasaan bahut

[paaband-e-anaa = bound by rules]

us ko bhii lag hii ga_ii shahr-e-mohabbat kii havaa
vo bhii 'Amjad' hai ka_ii din se pareshaan bahut