Meg Index | June 2002 Index

Date: 16-Jul-2002
Poet: Zafar Iqbal


yuu.N bhii nahii.n ki dil me.n ko_ii Gam nahii.n rahaa
ye sil_silaa kuchh itanaa muntazam nahii.n rahaa

[muntazam = orderly/arranged]

dil se to Khair dho ga_ii baarish tamaam naqsh
diivaar-e-shahar kaa bhii vo aalam nahii.n rahaa

zid par vo apanii aaj bhii qaayam to hai magar
agalaa-saa vo bayaan me.n dam_Kham nahii.n rahaa

[qaayam = immovable; fixed]

maayuus ho chukaa hai ki hai mutama_in ye dil
vo zaKhm bhar gaye hai.n ki marham nahii.n rahaa

[maayuus = disappointed; mutama_in = content; marham = salve]

kashtii-e-dil to ek thape.De kii maar thii
tuufaan-e-naaz kis liye ab tham nahii.n rahaa

chho.Dii hai jab se ham ne 'Zafar' aajizii kii Khuu
itanaa mizaaj us kaa bhii barham nahii.n rahaa

[aajizii = to be worried; Khuu = habit; barham = angry]