Meg Index | June 2002 Index

Date: 19-Jul-2002
Poet: Amjad Islam Amjad


dil me.n laavaa ubal rahaa hai kyaa
ko_ii koh_saar jal rahaa hai kyaa

Khvaab-e-fardaa zamii.n pe zaahir ho
merii aa.Nkho.n me.n pal rahaa hai kyaa

chashm-e-shabanam safiir-e-Gunachaa ban
yuu.N havaa ban ke chal rahaa hai kyaa

aa shariik-e-Gam_Khudaa_ii ho
apanii vahadat me.n gal rahaa hai kyaa

itane aasuudaa kyo.n hai.n ahal-e-safar
sar se tuufaan Tal rahaa hai kyaa

kis liye bad_havaas hai.n taare
ko_ii suuraj nikal rahaa hai kyaa

kyo.n havaa is qadar rukii-sii hai
ko_ii tuufaan pal rahaa hai kyaa

kaaT kar phe.nk de inhe.n 'Amjad'
aise haatho.n ko mal rahaa hai kyaa