Meg Index | September 2003 Index

Date: 30-Sep-2003
Poet: Pirzada Qasim

ik sazaa aur asiiro.n ko sunaa dii jaaye 
yaanii ab jurm-e-asiirii kii sazaa dii jaaye 

[asiir = prisoner]

us kii Khvaahish hai ke ab log na roye.n na ha.Nse.n 
behisii vaqt kii aavaaz banaa dii jaaye 

[Khvaahish = desire; behisii - insensible/derived of all senses]

dasht-e-naadiidaa kii tahaqiiq zaruurii hai magar 
pahale jo aag lagii hai vo bujhaa dii jaaye 

sirf jalanaa hii nahii.n ham ko bha.Dakanaa bhii to hai 
ishq kii aag ko laazim hai havaa dii jaaye 

sirf suuraj kaa nikalanaa hai agar subah to phir 
ek shab aur mere shab se milaa dii jaaye 

aur ik taazaa sitam us ne kiyaa hai iijaad 
us ko is baar zaraa khul ke duaa dii jaaye